Mikrokreditbank aksiyadorlik-tijorat banki tomonidan 2023-yil davomida amalga oshirilgan ishlar va erishilgan natijalar toʻgʻrisidagi maʼlumot
Bankning 2025-yilgacha rivojlantirish strategiyasi boʻyicha ishlab chiqilgan “Yoʻl xaritasi”da belgilangan chora-tadbirlar ijrosining taʼminlanishi natijasida 2023-yilda quyidagi ijobiy koʻrsatkichlarga erishildi.
Jumladan:
bank kapitali qariyb 4 trln. soʻmga;
umumiy aktivlar 12 foizga oshib, 19 trln. soʻmga;
kredit portfelining 1,5 trln.soʻmga oshishiga erishildi;
bankdagi umumiy depozitlar qoldigʻi 6,3 trln.soʻmga yetgan holda 2023-yilda 900 mlrd.soʻmlik qoʻshimcha mablagʻ jalb qilindi.
Hisobot davrida bank tomonidan, AQSH, Yevropa, Yaponiya, Saudiya Arabistoni hamda Jahon banki guruhiga kiruvchi moliya institutlari bilan tuzilgan 12 ta shartnomaga asosan 250,2 mln.dollar miqdordagi mablagʻlar jalb qilindi.
Jalb qilingan resurslar hisobidan barcha moliyalashtirish manbalari boʻyicha oʻtgan yilda 184 427 nafar mijozga 5,1 trln. soʻm kredit ajratilib, qariyb 99 169 ta yangi ish oʻrinlari yaratildi.
Hududlarni ijtimoiy-iqtisodiy rivojlantirish dasturi doirasida 2023-yilda 4,4 trln.soʻm (1,8 trln.soʻm bank krediti) qiymatdagi 859 ta loyihalar ishga tushirildi va natijada 11 897 ta yangi ish oʻrinlari yaratildi.
Bankka biriktirilgan parrandachilik sohasini moliyaviy qoʻllab-quvvatlash uchun 152 mlrd. soʻm kreditlar ajratilib, 279 ta parrandachilik korxonalari (yillik 1 571 mln.dona tuxum, 68 367 tonna goʻsht, 241 460 tonna ozuqa-yem mahsulotlari ishlab chiqarish quvvati yaratildi, 1 305 ta yangi ish oʻrinlari yaratildi) faoliyatining uzluksizligi taʼminlandi.
Oilaviy tadbirkorlikni rivojlantirish dasturlari doirasida hisobot davrida 1,7 trln.soʻm kreditlar ajratilib, 91 903 ta yangi ish oʻrinlari yaratilgan.
Ajratilgan kreditlar hisobiga:
20 211 nafar yoshlar;
21 200 nafar xotin-qizlar tadbirkorligini rivojlantirish;
37 430 nafar fuqarolarning oʻzini-oʻzi band qilish;
9 164 nafar ijtimoiy daftarlardagi aholining bandligi taʼminlandi.
Umumiy hisobda bankning moliyaviy koʻmagi hisobiga 2023-yilda 10 942 ta yangi tadbirkorlik subyektlari paydo boʻldi.
Bankda kreditlar ajratish bilan birga, avval ajratilgan kreditlarning qaytarilishiga ham alohida eʼtibor qaratildi. Xususan, kredit shartnomalariga asosan 2023-yilda qaytarilishi lozim boʻlgan 4,4 trln. soʻm kredit toʻlovlari undirildi, shundan 1,6 trln. soʻmi oilaviy tadbirkorlik yoʻnalishida ajratilgan kreditlar hissasiga toʻgʻri keladi.
Oʻzbekiston Respublikasi Prezidentining 2021-yil 21-apreldagi PQ-5088 sonli qarori ijrosini taʼminlash yoshlarning tadbirkorlik faoliyatini qoʻllab-quvvatlash maqsadida 2021-2023-yillarda 75 nafar yosh tadbirkorlarning loyihalariga 37,2 mlrd. soʻm va 3,5 mln. AQSH dollar bank kreditlari ajratilib, 730 ta yangi ish oʻrinlari yaratildi.
Bank transformatsiya jarayonlari natijasida 2023-yilda xizmat nuqtalari soni 574 taga, xizmat turlari soni 102 taga, bankomatlar soni 829 taga yetkazilib, elektron navbat tizimi qamrovi 98 foizga oshirilishi natijasida bankimiz tomonidan yil davomida 2 mln.dan ortiq mijozlarga xizmat koʻrsatildi.
Shuningdek:
jismoniy shaxslarga masofaviy xizmatlar koʻrsatish hajmi keskin oshirildi;
kreditlash tizimi avtomatlashtirilib, kredit ajratish jarayonida inson omili ishtiroki kamaytirildi, avtomatlashtirilgan kreditlar turi hamda soni ortgan;
bankda nazorat bloki, moliyaviy boshqaruv hamda risklarni boshqarish tizimi takmollashtirildi, “Green banking” yoʻnalishi joriy qilindi, KPI ragʻbatlantirish tizimi yoʻlga qoʻyildi, aloqa markazida konsalting xizmatlari joriy etildi.
Jismoniy shaxslar uchun “Mavrid” yangi mobil ilovasi, mijozbay ishlash uchun CRM, skoring, kredit konveeri tizimlari joriy qilindi, hududiy boʻlinmalar Yagona MFOga oʻtkazildi.
Bankda amalga oshirilgan raqamlashtirish hamda transformatsiya chora-tadbirlarida inson omilisiz koʻrsatiladigan bank xizmatlaridan onlayn foydalanuvchi jismoniy shaxslar ulushi 56 foizga, tadbirkorlar ulushi 77 foizga oshdi hamda onlayn tranzaksiyalar hajmi 1,1 trln. soʻmga yetdi.
Mikrokreditbank kelgusida ham aholiga va tadbirkorlik subyektlariga zamonaviy, sifatli bank xizmatlarini doimiy ravishda koʻrsatilishini taʼminlaydi.
